സ്പഗറ്റി പൊമൊ‍ഡൊറൊ വിത് വെജിറ്റബിൾസ്
1.എണ്ണ – മൂന്നു വലിയ സ്പൂൺ
2.സവാള – ഒന്ന്, ചെറുതായി അരിഞ്ഞത്
വെളുത്തുള്ളി – നാല് അല്ലി, ചെറുതായി അരിഞ്ഞത്
3.തക്കാളി – 10, കഷണങ്ങളാക്കിയത്
4.ഉപ്പ്, പഞ്ചസാര, കുരുമുളകുപൊടി – പാകത്തിന്
5.ബേസിൽ ലീവ്സ് (രാമതുളസിയില) – 10
6.മഞ്ഞ സുക്കിനി കഷണങ്ങളാക്കിയത് – 30 ഗ്രാം
പച്ച സുക്കിനി, കഷണങ്ങളാക്കിയത് – 30 ഗ്രാം
ചുവപ്പ്, പച്ച, മഞ്ഞ കാപ്സിക്കം കഷണങ്ങളാക്കിയത് – 20 ഗ്രാം വീതം
ബ്രോക്ക്‌ലി പൂക്കൾ അടർത്തിയത് – 30 ഗ്രാം
7.ഒലിവ് ഓയിൽ – പാകത്തിന്
8.സ്പഗറ്റി – 100 ഗ്രാം
പാകം ചെയ്യുന്ന വിധം
പാനിൽ എണ്ണ ചൂടാക്കി, സവാളയും വെളുത്തുള്ളിയും ചേർത്ത് ഏതാനും മിനിറ്റ് വഴറ്റുക. ഇതിലേക്കു തക്കാളിയും ചേർത്തു വഴറ്റിയശേഷം ഉപ്പും കുരുമുളകുപൊടിയും പഞ്ചസാരയും ചേർത്തിളക്കണം.നികക്കെ വെള്ളവും ഒഴിച്ചു വേവിക്കുക. ഏറ്റവുമൊടുവിൽ രാമതുളസിയിലയും ചേർത്തിളക്കി വാങ്ങി മിക്സിയിൽ അടിച്ചെടുക്കണം. ഇതാണ് ടുമാറ്റോ സോസ്.
ഇനി പാനിൽ ഒലിവ് ഓയിൽ ചൂടാക്കി ആറാമത്തെ ചേരുവ ചേർത്തു വഴറ്റി മാറ്റി വയ്ക്കുക.
സ്പഗറ്റി പാക്കറ്റിൽ പറഞ്ഞിരിക്കുന്ന പ്രകാരം വേവിച്ചൂറ്റി രണ്ടു വലിയ സ്പൂൺ ഒലിവ് ഓയിൽ ചേർത്തു കുടഞ്ഞു യോജിപ്പിച്ചു വയ്ക്കുക. ഇതു ടുമാറ്റോ സോസിൽ ചേർത്തു മെല്ലേ കുടഞ്ഞു യോജിപ്പിക്കുക.
ഏറ്റവും ഒടുവിൽ പച്ചക്കറികളും ചേർത്തിളക്കി ഭംഗിയായി അലങ്കരിച്ചു വിളമ്പാം.
പ്രോൺ കോക്ക്ടെയിൽ
1.ചെമ്മീൻ – അരക്കിലോ
2.നാരങ്ങാത്തെലി ചുരണ്ടിയത് – ഒരു നാരങ്ങയുടേത്
ഉപ്പ്, കുരുമുളകുപൊടി, സെലറി ഇല – അല്പം വീതം
3.മയണീസ് – ആറു വലിയ സ്പൂൺ
ടുമാറ്റോ സോസ് – ഒന്നോ, രണ്ടോ വലിയ സ്പൂൺ
ഉപ്പ് – പാകത്തിന്
ടബാസ്കോ സോസ് – ഒന്നോ, രണ്ടോ തുള്ളി
ഫ്രഷ് ക്രീം – കാല്‍ കപ്പ്
സ്പ്രിങ് അണിയൻ പൊടിയായി അരിഞ്ഞത് – ഒരു വലിയ സ്പൂൺ
4.നാരങ്ങാ – ഒന്ന്
5.ഐസ്ബർഗ് ലെറ്റൂസ് കീറിയത് – ഒരു പിടി
6.പാഴ്സലി ഇല പൊടിയായി അരിഞ്ഞത് – ഒരു വലിയ സ്പൂൺ
പാകം ചെയ്യുന്ന വിധം
ചെമ്മീൻ രണ്ടാമത്തെ ചേരുവ ചേർത്ത് ഒന്നു വേവിക്കുക. അധികം വെന്തുപോകരുത്. ഇതിൽ നിന്നു ചെമ്മീൻ മാത്രമെടുത്തു മാറ്റിവയ്ക്കണം.
മൂന്നാമത്തെ ചേരുവ യോ‍ജിപ്പിച്ചതിലേക്കു നാരങ്ങ പിഴിഞ്ഞൊഴിച്ചശേഷം ചെമ്മീൻ വേവിച്ചതും ചേർത്തു മെല്ലേ കുടഞ്ഞു യോജിപ്പിക്കുക.
നാലു ബൗൾ എടുത്ത് ഓരോ ബൗളിലും ലെറ്റൂസ് നിറയ്ക്കുക. ഇതിനു മുകളിലേക്കു ചെമ്മീൻ മിശ്രിതം ഇടുക. ഏറ്റവും മുകളിൽ പാഴ്സലി ഇലയും വിതറുക.
തക്കാളി, മുള്ളങ്കി തുടങ്ങി പലതരം പച്ചക്കറികൾ അരിഞ്ഞതും ഒലിവും കൊണ്ട് അലങ്കരിച്ചു വിളമ്പാം.
കടപ്പാട്
രാജീവ് മേനോൻ
