Wednesday 10 August 2022 02:23 PM IST : By Vanitha Pachakam

ബീഫ് കുറുമ, ഒരിക്കൽ കഴിച്ചാൽ പിന്നെ മറക്കില്ല ഇതിന്റെ രുചി!!

beef

ബീഫ് കുറുമ

1. ബീഫ് – ഒരു കിലോ, ചെറിയ കഷണങ്ങളാക്കിയത്

2. നെയ്യ്, എണ്ണ – കാൽ കപ്പ് വീതം

3. സവാള നീളത്തിൽ അരിഞ്ഞത് – ഒരു കപ്പ്

4. ഗ്രാമ്പൂ – ഒൻപത്

ഏലയ്ക്ക – ആറ്

കറുവാപ്പട്ട – ഒരിഞ്ചു നീളമുള്ള നാലു കഷണം

5. മഞ്ഞൾപ്പൊടി – ഒരു ചെറിയ സ്പൂൺ

6. വെളുത്തുള്ളി അരച്ചത് – രണ്ടു ചെറിയ സ്പൂൺ

7. ഇഞ്ചി അരച്ചത് – രണ്ടു ചെറിയ സ്പൂൺ

8. മല്ലിപ്പൊടി – രണ്ടു ചെറിയ സ്പൂൺ, അരച്ചത്

മുളകുപൊടി – ഒരു ചെറിയ സ്പൂൺ

9. തക്കാളി കഷണങ്ങളാക്കിയത് – അരക്കപ്പ്

10. തേങ്ങ ചുരണ്ടിയത് – കാൽ കപ്പ്

കശുവണ്ടിപ്പരിപ്പ് – 12

11. തേങ്ങാപ്പാൽ – അരക്കപ്പ്, ഒരു കപ്പ് തേങ്ങ ചുരണ്ടി പിഴിഞ്ഞെടുത്തത്

12. പുളിയില്ലാത്ത തൈര് – കാൽ കപ്പ്

ഉണക്കമുന്തിരി അരച്ചത് – രണ്ടു ചെറിയ സ്പൂൺ

13. പച്ചമുളക് – ആറ്, അറ്റം പിളർന്നത്

14. നാരങ്ങാനീര് – ഒരു ചെറിയ സ്പൂൺ

15. മല്ലിയില, പുതിനയില – കാൽ കപ്പ് വീതം

പാകം ചെയ്യുന്ന വിധം

∙ ബീഫ് കഴുകി വൃത്തിയാക്കി വയ്ക്കുക.

∙ നെയ്യും എണ്ണയും ചൂടാക്കി സവാള ചേർത്ത് വഴറ്റുക. ഇളം ചുവപ്പുനിറത്തിലായി മൂത്തമണം വരുമ്പോൾ നാലാമത്തെ ചേരുവ ചേർത്തു വഴറ്റണം.

∙ ഇതിൽ മഞ്ഞൾപ്പൊടി ചേർത്തു മൂത്തമണം വരുമ്പോൾ വെളുത്തുള്ളി അരച്ചതു ചേർത്തു വഴറ്റിയ ശേഷം ഇഞ്ചി അരച്ചതു ചേർത്തു വഴറ്റുക. ഇതിൽ മല്ലിപ്പൊടിയും മുളകുപൊടിയും ചേർത്തു ചെറുതീയിൽ വഴറ്റണം.

∙ ഇതിലേക്കു തക്കാളി ചേർത്തു വഴറ്റിയ ശേഷം ബീഫ് ചേർത്ത് അൽപസമയം വഴറ്റുക. ഇതിൽ പത്താമത്തെ ചേരുവ അരച്ചതു തേങ്ങാപ്പാലിൽ കലക്കി ചേർക്കണം.

∙ ഇറച്ചി പകുതി വെന്ത ശേഷം 12ാമത്തെ ചേരുവയും പച്ചമുളകും ചേർത്തു പാത്രം മൂടി വച്ചു വേവിക്കുക.

∙ കഷണങ്ങളിൽ ചേരുവകൾ പിടിച്ച ശേഷം വാങ്ങുന്നതിന് അൽപം മുൻപ് നാരങ്ങാനീരു ചേർക്കുക. ചാറ് അധികം കുറുകാതെ ഇടത്തരം അയവിൽ ആയിരിക്കണം.

∙ മല്ലിയിലയും പുതിനയിലയും തൂവി വാങ്ങാം.