കട്ടിപ്പാലിൽ കുറുക്കിയെടുത്ത കോക്കനട്ട് ക്രീമി റൈസിനൊപ്പം, എരിവും പുളിയും ചേർന്ന ഗ്രിൽഡ് ഗ്രീൻ ഫിഷ്. ആരോഗ്യകരവും അതോടൊപ്പം അതീവ രുചികരവുമാണ് ഈ വിഭവം.
ആവശ്യമായ ചേരുവകൾ
1. നെയ്മീൻ – അരക്കിലോ
2. ഉപ്പ് – പാകത്തിന്
കുരുമുളകുപൊടി – പാകത്തിന്
നാരങ്ങാനീര് – ഒരു ചെറിയ സ്പൂണ്
3. വെളിച്ചെണ്ണ– പാകത്തിന്
4. ഗ്രാമ്പൂ, ഏലയ്ക്ക – മൂന്നു വീതം
കറുവാപ്പട്ട – ഒരു കഷ്ണം
5. സവാള – രണ്ട്,അരിഞ്ഞത്
പച്ചമുളക് - അഞ്ച്,അരിഞ്ഞത്
6. വെളുത്തുള്ളിയും ഇഞ്ചിയും ചതച്ചത് - ഓരോ ചെറിയ സ്പൂൺ
7. തേങ്ങ ചുരണ്ടിപ്പിഴിഞ്ഞ ഒന്നാംപാൽ – ഒരു കപ്പ്
രണ്ടാംപാൽ – ഒന്നരക്കപ്പ്
8. തക്കാളി – രണ്ട്, വട്ടത്തിൽ അരിഞ്ഞത്
കുരുമുളകുപൊടി - ഒരു ചെറിയ സ്പൂൺ
കറിവേപ്പില – രണ്ടു തണ്ട്
9. തേങ്ങ ചുരണ്ടിയത് – ഒരു വലിയ സ്പൂൺ
കശുവണ്ടിപ്പരിപ്പ് - ആറ്
10. കൈമ അരി - രണ്ടു കപ്പ്
11. നെയ്യ് – ഒരു ചെറിയ സ്പൂൺ
12. ഗ്രാമ്പൂ, ഏലയ്ക്ക – മൂന്നു വീതം
കറുവാപ്പട്ട – ഒരു കഷണം
13. ഇഞ്ചി വെളുത്തുള്ളി പച്ചമുളകു പേസ്റ്റ് – ഒരു വലിയ സ്പൂൺ
14. തൈര് - ഒരു വലിയ സ്പൂൺ
15. വെള്ളം – മൂന്നരക്കപ്പ്
16. ഗരംമസാലപ്പൊടി - ഒരു ചെറിയ സ്പൂൺ
നെയ്യ് - രണ്ടു ചെറിയ സ്പൂൺ
മല്ലിയില അരിഞ്ഞത് - രണ്ടു വലിയ സ്പൂൺ
പുതിനയില അരിഞ്ഞത് – ഒരു വലിയ സ്പൂൺ
പാകം ചെയ്യുന്ന വിധം
∙ മീൻ വൃത്തിയാക്കി രണ്ടാമത്തെ ചേരുവ പുരട്ടി അൽപം വെളിച്ചെണ്ണയിൽ വറുത്തു മാറ്റിവയ്ക്കുക.
∙ മറ്റൊരു പാനിൽ വെളിച്ചെണ്ണ ചൂടാക്കി നാലാമത്തെ ചേരുവ മൂപ്പിച്ച ശേഷം സവാളയും പച്ചമുളകും ചേർത്തു വഴറ്റുക.
∙ ഇതിലേക്ക് ഇഞ്ചിയും വെളുത്തുള്ളിയും ച തച്ചതു ചേർത്തു വഴറ്റി, രണ്ടാംപാൽ ഒഴിച്ചിളക്കുക.
∙ തിളച്ച ശേഷം വറുത്തു വച്ച മീനും എട്ടാമത്തെ ചേരുവയും ചേർത്തു വറ്റി വരുമ്പോൾ കശുവണ്ടിപ്പരിപ്പും തേങ്ങയും അരച്ചു ചേർത്ത ഒന്നാംപാൽ ചേർത്തിളക്കി വാങ്ങുക.
∙ അരി 20 മിനിറ്റ് കുതിർത്ത് ഊറ്റി വയ്ക്കുക.
∙ ചുവടുകട്ടിയുള്ള പാത്രത്തിൽ ഒരു സ്പൂൺ നെയ്യ് ചൂടാക്കി 12 ആമത്തെ ചേരുവ മൂപ്പിച്ച ശേഷം വെളുത്തുള്ളി–ഇഞ്ചി–പച്ചമുളക് പേസ്റ്റ് ചേർത്ത് മൂപ്പിക്കുക.
∙ ഇതിലേക്കു തൈരും മൂന്നരക്കപ്പ് തിളച്ച വെള്ളവും ചേർത്തിളക്കി, കുതിർത്തൂറ്റിയ അരിയും പാകത്തിനുപ്പും ചേർത്തിളക്കി വറ്റിച്ചെടുക്കുക.
. വറ്റി വരുമ്പോൾ തയ്യാറാക്കിയ മീനിന്റെ ഗ്രേവിയിൽ നിന്നു മൂന്നു വലിയ സ്പൂൺ ഗ്രേവി കൂടി ചേർത്തിളക്കി വാങ്ങുക.
∙ ചുവടുകട്ടിയുള്ള പാത്രത്തിൽ അൽപം ചോറു നിരത്തി, മീനിന്റെ ഗ്രേവി മാത്രം ഒഴിച്ചു കൊടുക്കുക.
∙ അതിനു മുകളിൽ ബാക്കി ചോറിന്റെ പകുതി നിരത്തി 1ആമത്തെ ചേരുവ യോജിപ്പിച്ചതു നിരത്തുക.
∙ ഇതിനു മുകളിൽ ബാക്കി ചോറു നിരത്തി, അതിനു മുകളില് മീനും നിരത്തി, അടച്ചു വച്ച് 15 മിനിറ്റ് ദം ചെയ്തെടുക്കുക.
∙ ഗ്രിൽഡ് ഫിഷ് തയാറാക്കാൻ രണ്ടു പീസ് വലുതായി നുറുക്കിയ മീൻ പാകത്തിനുപ്പും കുരുമുളകുപൊടിയും നാരങ്ങനീരും പുരട്ടി അല്പം എണ്ണയിൽ വറുത്തെടുക്കുക.
. കാൽ കപ്പ് തേങ്ങ ചുരണ്ടിയത്, അഞ്ചു ചുവന്നുള്ളി, ഒരു ചെറിയ സ്പൂൺ പച്ചക്കുരുമുളക്, ഏഴു കാന്താരി, രണ്ടു കഷണം പച്ചമാങ്ങ പൊരിച്ചത്, കറിവേപ്പില എന്നിവ പാകത്തിനുപ്പും ചേർത്തരച്ചു ചമ്മന്തി തയാറാക്കുക.
. പാനിൽ വാഴയില വച്ച് അൽപം വെളിച്ചെണ്ണ ഒഴിച്ച്, കറിവേപ്പില നിരത്തുക.
. ഇതിനു മുകളിൽ ചമ്മന്തിയിൽ പൊതിഞ്ഞ മീൻ വച്ച്, കാൽ കപ്പ് കട്ടിത്തേങ്ങാപ്പാൽ ഒഴിച്ചു പൊള്ളിച്ചെടുത്തു റൈസിനൊപ്പം വിളമ്പാം.