മധുരപലഹാരത്തിന് പകരം സ്പെഷൽ ബ്രെഡ് കപ്പ്സ് ഉണ്ടാക്കിയാലോ.

ആവശ്യമായ ചേരുവകൾ 

1.   റൊട്ടി – എട്ടു സ്ലൈസ്

2.   വെണ്ണ – ആറു വലിയ സ്പൂൺ

3.   ചീര പൊടിയായി അരിഞ്ഞത്  – ഒരു കപ്പ്

4.   മുട്ട – മൂന്ന്

    ചീസ് ഗ്രേറ്റ് ചെയ്തത്  – 10 വലിയ സ്പൂൺ

    പാൽപ്പൊടി – ഒരു വലിയ സ്പൂൺ

    പാൽ – അരക്കപ്പ്

    ഉപ്പ്, കുരുമുളകുപൊടി – പാകത്തിന്

5.  തക്കാളി – രണ്ട്, ഓരോന്നും നാലായി മുറിച്ചത്

പാകം ചെയ്യുന്ന വിധം

∙ അവ്ൻ 180 ഡിഗ്രി സെൽഷ്യസിൽ ചൂടാക്കിയിടുക.

∙ റൊട്ടിയുടെ അരികു കളയുക.

∙ ഓരോ സ്ലൈസ് റൊട്ടിയിലും വെണ്ണ പുരട്ടി, വെണ്ണ പുരട്ടിയ വശം താഴെ വരും വിധം ഓരോ സ്ലൈസും ഓരോ മഫിൻ ടിന്നിൽ വയ്ക്കണം.

∙ രണ്ടു വലിയ സ്പൂൺ വെണ്ണ ചൂടാക്കി അതിൽ ചീര വഴറ്റിക്കോരി ഓരോ ബ്രെഡ് കപ്പിലായി നിറയ്ക്കണം.

∙ നാലാമത്തെ ചേരുവ അടിച്ചു യോജിപ്പിച്ചത് ചീര മിശ്രിതത്തിനു മുകളിൽ ഒഴിച്ച് 20 മിനിറ്റ് ബേക്ക് ചെയ്യുക.

∙ ഓരോന്നിലും ആവശ്യമെങ്കിൽ ഓരോ കഷണം തക്കാളി വച്ചു വിളമ്പാം.

∙ ചീരയ്ക്കു പകരം ചിക്കനോ മറ്റു പച്ചക്കറികളോ ഉപയോഗിക്കാം.

 Elizabeth Jyothi Mathew, Kottayam