ബേക്ക് ചെയ്ത സെലറിയുടെ ക്രീമി രുചി, കഴിക്കാൻ എന്ത് രസമാണ് സെലറി ഗ്രാറ്റിൻ

സെലറി ഇഷ്ടപ്പെടുന്നവർക്കായുള്ള ഈസി വിഭവമാണ് സെലറി ഗ്രാറ്റിൻ. ഇതൊരു സൈഡ് ഡിഷ് ആയിട്ടാണ് സാധാരണയായി വിളമ്പുന്നത്. സെലറിയുടെ തനതായ രുചിയും ക്രീം ചീസുമെല്ലാം ചേർന്ന ഈ വിഭവം വളരെ രുചികരമാണ്. 

ആവശ്യമായ ചേരുവകൾ
1. വെണ്ണ – ഒരു വലിയ സ്പൂൺ
2. സെലറി കനം കുറച്ചു മുറിച്ചത് – രണ്ടു കപ്പ് 
3. ഫ്രെഷ് ക്രീം – അരക്കപ്പ്
    ചെഡ്ഡർ ചീസ് ഗ്രേറ്റ് ചെയ്തത് – രണ്ടു കപ്പ്
     ഉപ്പ്, കുരുമുളകുപൊടി – പാകത്തിന്
4. ഒലിവ് ഓയിൽ – ഒരു വലിയ സ്പൂൺ
5. റൊട്ടി പൊടിച്ചത് – ഒരു കപ്പ്

പാകം ചെയ്യുന്ന വിധം
∙ അവ്ൻ 180 ഡിഗ്രി സെൽഷ്യസിൽ ചൂടാക്കിയിടണം.
∙ സോസ്പാനിൽ വെണ്ണയുരുക്കി സെലറി ചേർത്ത് ഒരു മിനിറ്റ് വഴറ്റിയ ശേഷം തീ കുറച്ചു മൂടിവച്ചു 2 മിനിറ്റ് വേവിക്കുക. സെലറി മൃദുവാകണം.
∙ വാങ്ങി വച്ച ശേഷം മൂന്നാമത്തെ ചേരുവ ചേർത്തിളക്കി ഉപ്പും എരിവും പാകത്തിനാക്കുക. 
∙ റൊട്ടിപ്പൊടിക്കു മുകളിൽ ഒലിവ് ഓയിൽ മെല്ലേ തളിച്ചു തുടരെ ഇളക്കുക.  
∙ ഒരു ബേക്കിങ് ഡിഷിൽ സെലറി മിശ്രിതം നിരത്തി മുകളിൽ റൊട്ടിപ്പൊടി വിതറുക. ഇത് അവ്നിൽ വച്ച് 8-10 മിനിറ്റ് ബേക്ക് ചെയ്യുക. ഗോൾഡൻ നിറമാകുന്നതാണു കണക്ക്.
∙ ചൂടോടെ വിളമ്പാം.