എരിവും പുളിയും ഒത്തുവന്ന കേരളീയ തനിമയുള്ള വിഭവം. സദ്യവട്ടങ്ങൾക്കും സാധാരണ ഊണിനും മാറ്റുകൂട്ടാൻ ഒരു മുളകാപ്പച്ചടി മതി
ആവശ്യമായ ചേരുവകൾ
1. വാളൻപുളി - 250 ഗ്രാം
2. മുളകുപൊടി - ഒരു ചെറിയ സ്പൂണ്
മഞ്ഞൾപ്പൊടി – അര ചെറിയ സ്പൂണ്
ഉപ്പ് – പാകത്തിന്
3. ശർക്കര - 500 ഗ്രാം
4. വെളിച്ചെണ്ണ- രണ്ടു വലിയ സ്പൂണ്
5. പച്ചമുളക് - 100 ഗ്രാം, പൊടിയായി അരിഞ്ഞത്
ഇഞ്ചി - ഒരു ചെറിയ കഷണം, പൊടിയായി അരിഞ്ഞത്
6. കടുക് - രണ്ടു വലിയ സ്പൂണ്
എള്ള് - ഒരു വലിയ സ്പൂണ്
7. വറ്റൽമുളക് - നാല്
കറിവേപ്പില - രണ്ടു തണ്ട്
പാകം ചെയ്യുന്ന വിധം
∙ വാളൻപുളി അധികം വെള്ളം ചേർക്കാതെ പിഴിഞ്ഞു വയ്ക്കുക.
∙ ചുവടുകട്ടിയുള്ള ചട്ടിയില് പുളിവെള്ളവും രണ്ടാമത്തെ ചേരുവയും ചേർത്തു നന്നായി തിളപ്പിച്ചു കുറുകിവരുമ്പോൾ ശർക്കര ചേർക്കുക.
. ശർക്കരയിലെ വെള്ളം വറ്റി വരണം.
∙ ഈ സമയം ഒരു ചീനച്ചട്ടിയിൽ ഒരു ചെറിയ സ്പൂണ് വെളിച്ചെണ്ണ ചൂടാക്കി പച്ചമുളകും ഇഞ്ചിയും നന്നായി വഴറ്റുക.
∙ ഇതു പുളി മിശ്രിതത്തില് ചേര്ത്തു നന്നായി കുറുകി വരുമ്പോൾ എള്ളും കടുകും വറുത്തു പൊടിച്ചു ചേർക്കുക.
. അവസാനം വറ്റൽമുളകും കറിവേപ്പിലയും ബാക്കി വെളിച്ചെണ്ണയിൽ താളിച്ചു കറിയില് ചേർക്കാം.