‘അപൂർവമായ അനുഭവത്തിന്റെയും എഴുത്തിന്റെയും വിസ്മയക്കാഴ്ചകൾ’: സുരേഷ് ബാബുവിന്റെ ഓർമയെഴുത്തുകൾ Unveiling Forgotten Lives: Suresh Babu Alakkode's 'Varsham Vannu Kanathathum Grishmam Ninnu Peythathum'

സുരേഷ് ബാബു ആലക്കോടിന്റെ ഓർമക്കുറിപ്പുകളുടെ സമാഹാരമാണ് ‘വർഷം വന്നു കനത്തതും ഗ്രീഷ്മം നിന്നു പെയ്തതും’.

ജനിച്ചു വളർന്ന നാട്ടിലും നടന്നു തീർത്ത വഴികളിലും അരികുവല്കരിക്കപ്പെട്ട മനുഷ്യരെ അടുത്തു നിന്നു കാണാൻ ശ്രമിച്ചപ്പോഴാണ് ഈ പുസ്തകം പിറന്നത്.

ഒരു പക്ഷേ ‘പണ്ടിങ്ങനെയൊരാൾ ജീവിച്ചിരുന്നിരുന്നു’ എന്നു മാത്രം പഴമക്കാർ ആരെങ്കിലും എപ്പോഴെങ്കിലും ഓർത്തേക്കാവുന്ന വെറും മനുഷ്യരായിരുന്നു അവർ. സ്മൃതി മണ്ഡപങ്ങളോ പ്രതിമകളോ തീർക്കപ്പെടാൻ മാത്രം സാമൂഹ്യ പ്രസിദ്ധിയില്ലാത്തവർ. പക്ഷേ, അവരെ കൂടി ചേർത്താലേ ആ ദേശത്തിന്റെ ചരിത്ര നിർമ്മിതി പൂർണമാകൂ. അവരാണ് അബോധപൂർവ്വമെങ്കിലും ഒഴിച്ചുകൂടാനാവാത്ത സംഭവങ്ങളെ ആ ദേശത്തിന് നിർമ്മിച്ചു നല്കിയത്.

വിശപ്പും വിപ്ലവവും ഉന്മാദവും പ്രണയവും തമാശയും രതിയും പല ദ്വന്ദ്വങ്ങളായി നമുക്ക് അനുഭവപ്പെട്ടത് ഇവരിലൂടെത്തന്നെയാണ്. എല്ലാവരുടേയും കാഴ്ചവട്ടത്തിൽ ഇത്തരം മനുഷ്യർ ധാരാളമുണ്ടാകും.

അയ്യോ അവരെക്കുറിച്ചെഴുതിയില്ലല്ലോ താനെന്ന് ഓരോ ദേശത്തെ എഴുത്തുകാരിലും നഷ്ടബോധം നിറയ്ക്കുന്ന മനുഷ്യരാണവർ. ഈ പുസ്തകത്തിലെ 24 അധ്യായങ്ങളിൽ അത്തരം 24 ജീവിതങ്ങളുണ്ട്.

‘അപൂർവമായ അനുഭവത്തിന്റെയും എഴുത്തിന്റെയും വിസ്മയക്കാഴ്ചകൾ’ എന്നാണ് ഈ പുസ്തകത്തിന്റെ അവതാരികയിൽ പ്രശസ്ത കഥാകൃത്ത് സന്തോഷ് ഏച്ചിക്കാനം കുറിച്ചിരിക്കുന്നത്.