ബിണ്ടി ആലു മസാല!
1. വെണ്ടയ്ക്ക - കാൽ കിലോ
2. ഉരുളക്കിഴങ്ങ് - 100 ഗ്രാം
3. എണ്ണ - രണ്ടു വലിയ സ്പൂൺ
4. ജീരകം - കാൽ ചെറിയ സ്പൂൺ
5. പച്ചമുളക് അരിഞ്ഞത് - ഒരു ചെറിയ സ്പൂൺ
കറിവേപ്പില - കുറച്ച്
ഇഞ്ചി അരച്ചത് - ഒരു ചെറിയ സ്പൂൺ
വെളുത്തുള്ളി അരച്ചത് - ഒരു ചെറിയ സ്പൂൺ
6. മഞ്ഞൾപ്പൊടി - കാൽ ചെറിയ സ്പൂൺ
7. മല്ലിപ്പൊടി - ഒരു ചെറിയ സ്പൂൺ
മുളകുപൊടി - കാൽ ചെറിയ സ്പൂൺ
ജീരകം പൊടിച്ചത് - കാൽ ചെറിയ സ്പൂൺ
ഉപ്പ് - പാകത്തിന്
8. തക്കാളി - 200 ഗ്രാം, ചെറുതായി അരിഞ്ഞത്
9. മല്ലിയില അരിഞ്ഞത് - അലങ്കരിക്കാൻ
പാകം ചെയ്യുന്ന വിധം
∙ വെണ്ടയ്ക്ക വൃത്തിയാക്കി ഓരോന്നും രണ്ടാക്കി വയ്ക്കുക.
∙ ഉരുളക്കിഴങ്ങു തൊലികളഞ്ഞു മുറിച്ച്, മുക്കാൽ വേവിൽ വേവിച്ചു വാങ്ങുക.
∙ ചീനച്ചട്ടിയിൽ എണ്ണ ചൂടാക്കി ജീരകം മൂപ്പിക്കുക.
∙ ഇതിൽ അഞ്ചാമത്തെ ചേരുവ ചേർത്തു വഴറ്റിയ ശേഷം മഞ്ഞൾപ്പൊടിയും വെണ്ടയ്ക്കയും ചേർത്ത് ഒരു മിനിറ്റ് വഴറ്റുക.
∙ പിന്നീട് അഞ്ചു മിനിറ്റ് ചെറുതീയിൽ അടച്ചു വച്ചു വേവിക്കുക. ഇതിലേക്കു വേവിച്ചു വച്ചിരിക്കുന്ന ഉരുളക്കിഴങ്ങ് ചേർത്തിളക്കിയ ശേഷം ഏഴാമത്തെ ചേരുവയും ചേർത്തു നന്നായി ഇളക്കുക.
∙ തക്കാളി ചേർത്തിളക്കി വീണ്ടും അടച്ചു ചെറുതീയിൽ വയ്ക്കുക. വെള്ളം മുഴുവൻ വലിഞ്ഞ്, മസാല വെണ്ടക്കയിലും ഉരുളക്കിഴങ്ങിലും പൊതിഞ്ഞിരിക്കണം.
∙ വെണ്ടക്കയും ഉരുളക്കിഴങ്ങും നന്നായി വെന്ത ശേഷം വാങ്ങി മല്ലിയില കൊണ്ടലങ്കരിച്ചു ചൂടോടെ വിളമ്പുക.
