എല്ലാ ദിവസവും ഉച്ചയൂണിന് ഒരേ രുചിയുള്ള കറികൾ കഴിച്ച് മടുത്തവരായിരിക്കും മിക്ക ആളുകളും. അത്തരം സാഹചര്യങ്ങളിൽ പരീക്ഷിച്ച് നോക്കാവുന്ന ഒരു കറിയാണ് ഇഞ്ചി പച്ചടി. ദഹനസംബന്ധമായ എല്ലാ പ്രശ്നങ്ങൾക്കും ഈ ഒരു ഇഞ്ച് തൈര് ഉപയോഗിക്കാവുന്നതാണ്.
ചേരുവകൾ
1.നല്ല കട്ടിയുള്ള തൈര് നല്ലതുപോലെ അടിച്ചെടുത്തത് - 1 & 1/2 കപ്പ്
2.ഇഞ്ചി മീഡിയം സൈസിലുള്ള 2 കഷണം
3.തേങ്ങ - 1/2 കപ്പ്
4.പച്ചമുളക് എരുവിന് അനുസരിച്ച്
5.കറിവേപ്പില - ഒരു തണ്ട്
6.താളിച്ചിടാൻ ആവശ്യമായ എണ്ണ - 1ടേബിൾസ്പൂൺ
7.കടുക് - 1 ടീസ്പൂൺ
8.വറ്റൽ മുളക് - 2
9.ചെറുതായി അരിഞ്ഞെടുത്ത ഇഞ്ചി - 1 ടേബിൾസ്പൂൺ
തയാറാക്കുന്ന വിധം
∙തൈര് കട്ടയില്ലാതെ മയത്തിൽ അടിച്ചു വയ്ക്കുക.
∙മിക്സിയുടെ ജാറില്‍ മീഡിയം വലിപ്പത്തിൽ അരിഞ്ഞുവെച്ച ഇഞ്ചി കഷണങ്ങൾ ഇട്ടുകൊടുക്കുക.
∙അതിലേക്ക് തേങ്ങയും, പച്ചമുളകും, കറിവേപ്പിലയുടെ രണ്ട് ഇലയും, ഒരു ടീസ്പൂൺ തൈരും കൂടി ചേർത്ത് മയത്തിൽ അരച്ചെടുക്കുക.
∙നന്നായി അരഞ്ഞു വന്നാൽ രണ്ട് ടീസ്പൂൺ തൈര് കൂടി അതിലേക്ക് ഒഴിച്ച് മിക്സിയുടെ ജാറിലിട്ട് അടിച്ചെടുക്കാവുന്നതാണ്. ഈയൊരു കൂട്ട് അടിച്ചുവച്ച തൈരിലേക്ക് ചേർത്ത് നല്ലതുപോലെ മിക്സ് ചെയ്യുക.
∙കറിയുടെ കൺസിസ്റ്റൻസി ആവശ്യാനുസരണം വെള്ളമൊഴിച്ച് മാറ്റിയെടുക്കാവുന്നതാണ്.
∙ആവശ്യത്തിന് ഉപ്പ് കൂടി ചേർത്തു കൊടുക്കാം.
∙ഒരു ചെറിയ പാൻ ചൂടായി വരുമ്പോൾ വെളിച്ചെണ്ണ ഒഴിച്ച് അതിലേക്ക് കടുകും, ചെറുതായി അരിഞ്ഞെടുത്ത ഇഞ്ചിയും, ഉണക്കമുളകും, കറിവേപ്പിലയും ഇട്ടുകൊടുക്കുക. താളിപ്പ് കറിയിലേക്ക് ചേർത്ത് നല്ലതുപോലെ മിക്സ് ചെയ്യുക.
