ഏത്തപ്പഴം നിറയെ പോഷകങ്ങളാണത്രേ.. കുട്ടികൾക്കു പെട്ടെന്ന് എനർജി പകർന്നു നൽകാൻ ഏത്തപ്പഴം ഏറെ ഗുണം ചെയ്യുമെന്നു പഠനങ്ങൾ. ഏത്തപ്പഴം കൊണ്ടു തയാറാക്കാം ആരെയും കൊതിപ്പിക്കുന്ന രണ്ടു സ്നാക്കുകൾ.
ക്രൻചി ബനാനാ റോൾ
1. നെയ്യ് – ഒരു വലിയ സ്പൂൺ
2. നേന്ത്രപ്പഴം – നാല്, കഷണങ്ങളാക്കിയത്
3. തേങ്ങ ചുരണ്ടിയത് – അരക്കപ്പ്
കശുവണ്ടിപ്പരിപ്പ് നുറുക്ക് – രണ്ടു വലിയ സ്പൂൺ
ഉണക്കമുന്തിരി – ഒരു വലിയ സ്പൂൺ
ഏലയ്ക്കാപ്പൊടി – ഒരു നുള്ള്
പഞ്ചസാര – പാകത്തിന്
4. മൈദ – അരക്കപ്പ്
വെള്ളം – പാകത്തിന്
5. കോൺഫ്ളേക്ക്സ് – അരക്കപ്പ്
റൊട്ടിപ്പൊടി – ഒരു കപ്പ്
6. എണ്ണ – വറുക്കാൻ പാകത്തിന്
പാകം ചെയ്യുന്ന വിധം
∙ പാനിൽ നെയ്യ് ചൂടാക്കി നേന്ത്രപ്പഴം മുറിച്ചതു ചേർത്തു നന്നായി വഴറ്റി ഉടച്ചെടുക്കുക.
∙ ഇതിലേക്കു മൂന്നാമത്തെ ചേരുവ ചേർത്തു നന്നായി യോജിപ്പിച്ച് അടുപ്പിൽ നിന്നു വാങ്ങി വയ്ക്കുക.
∙ ഈ മിശ്രിതത്തിൽ നിന്ന് അല്പാല്പം വീതം എടുത്തു നീളത്തിൽ റോൾ പോലെ ഉരുട്ടിയെടുക്കുക.
∙ ഓരോ റോളും മൈദ വെള്ളം ചേർത്തു കലക്കിയതിൽ മുക്കി കോൺഫ്ളേക്ക്സിലും റൊട്ടിപ്പൊടിയിലും പൊതിഞ്ഞു ചൂടായ എണ്ണയിൽ വറുത്തു കോരുക.
ഏത്തപ്പഴം ഹൽവ
1. ഏത്തപ്പഴം – ഒരു കിലോ
2. പഞ്ചസാര – അരക്കിലോ
വെള്ളം – അരക്കപ്പ്
3. ചെറുനാരങ്ങാനീര് – കാൽ കപ്പ്
4. മൈദ – നാലു ചെറിയ സ്പൂൺ, അരക്കപ്പ് വെള്ളത്തിൽ കലക്കിയത്
5. നെയ്യ് – ഒരു കപ്പ്
6. ഏലയ്ക്ക പൊടിച്ചത് – അര ചെറിയ സ്പൂൺ
7. കശുവണ്ടിപ്പരിപ്പ് നീളത്തിൽ അരിഞ്ഞത് – അരക്കപ്പ്
പാകം ചെയ്യുന്ന വിധം
∙ ഏത്തപ്പഴം പുഴുങ്ങി നാരും അരിയും കളഞ്ഞ് അരച്ചെടുക്കുക. പഞ്ചസാര വെള്ളം ചേർത്ത് ഉരുക്കി അ രിച്ചെടുക്കണം.
∙ ഇതിൽ ചെറുനാരങ്ങാനീരും ചേർത്ത് അടുപ്പത്തു വച്ചിളക്കി കുറുകി വരുമ്പോൾ ഏത്തപ്പഴം പുഴുങ്ങി അരച്ചതു ചേർത്തു തുടരെയിളക്കുക. തിളയ്ക്കുമ്പോൾ വെള്ളത്തിൽ കലക്കിയ മൈദ അരിച്ചൊഴിച്ച്, അടിക്കു പിടിക്കാതെ തുടരെയിളക്കി, അൽപാൽപം വീതം നെയ്യ് ചേർത്തു കുറുകുമ്പോൾ ഏലയ്ക്ക പൊടിച്ചതു ചേർത്തിളക്കുക.
∙ കശുവണ്ടിപ്പരിപ്പിന്റെ പകുതിയും ചേർത്തിളക്കി നന്നായി മുറുകുമ്പോൾ വാങ്ങി നെയ്മയം പുരട്ടിയ പാത്രത്തിൽ ഒഴിച്ചു ബാക്കിയുള്ള കശുവണ്ടിപ്പരിപ്പു മുകളിൽ വിതറുക.
∙ ചൂടാറിയ ശേഷം ഇഷ്ടമുള്ള ആകൃതിയിൽ മുറിച്ച് ഉപയോഗിക്കാം.