ഫോട്ടോ : ശ്രീകാന്ത് കളരിക്കൽ, ഫോട്ടോയ്ക്കു വേണ്ടി വിഭവങ്ങൾ തയാറാക്കിയത്: പ്രദീപ് കെ. വർഗീസ്, മലയാള മനോരമ, കോട്ടയം.
1. ബ്രെഡ് – നാലു സ്ലൈസ്
2. കടലമാവ് – അരക്കപ്പ്
അരിപ്പൊടി – രണ്ടു വലിയ സ്പൂൺ
ചീസ് ഗ്രേറ്റ് ചെയ്തത് – മൂന്നു വലിയ സ്പൂൺ
സവാള പൊടിയായി അരിഞ്ഞത് – മൂന്നു വലിയ സ്പൂൺ
തക്കാളി പൊടിയായി അരിഞ്ഞത് – മൂന്നു വലിയ സ്പൂൺ
മല്ലിയില പൊടിയായി അരിഞ്ഞത് – രണ്ടു വലിയ സ്പൂൺ
പച്ചമുളക് – രണ്ട്, പൊടിയായി അരിഞ്ഞത്
ടുമാറ്റോ സോസ് – രണ്ടു വലിയ സ്പൂൺ
ഉപ്പ് – പാകത്തിന്
മുളകുപൊടി – അര ചെറിയ സ്പൂൺ
മഞ്ഞൾപ്പൊടി – ഒരു നുള്ള്
നാരങ്ങാനീര് – ഒരു ചെറിയ സ്പൂൺ
3. വെള്ളം – അരക്കപ്പ്
4. എണ്ണ – വറുക്കാൻ ആവശ്യത്തിന്
പാകം ചെയ്യുന്ന വിധം
∙ ബ്രെഡ് ചെറിയ കഷണങ്ങളായി കീറി ഒരു വലിയ ബൗളിലാക്കി വയ്ക്കണം.
∙ ഇതിലേക്കു രണ്ടാമത്തെ ചേരുവ ചേർത്ത ശേഷം ഒരു സ്പൂൺ കൊണ്ട് ഇളക്കി യോജിപ്പിക്കുക.
∙ ഇതില്‍ അൽപാൽപം വീതം വെള്ളം ചേർത്തു കൈകൊണ്ടു മെല്ലേ കുഴച്ചു യോജിപ്പിക്കുക. ബ്രെഡ് കഷണങ്ങൾ മുഴുവനായും ഉടയുന്നതാണു പാകം.
∙ എണ്ണ നന്നായി ചൂടാക്കി ഓരോ സ്പൂൺ വീതം ബ്രെഡ് മിശ്രിതം ചേർത്തു രണ്ട്– മൂന്നു മിനിറ്റ് വറുക്കുക. ഇരുവശവും ഗോൾ‍ഡൻ നിറമായി കരുകരുപ്പാകുമ്പോൾ കോരി ചൂടോടെ ഗ്രീൻ ചട്നിക്കോ ടുമാറ്റോ കെച്ചപ്പിനോ ഒപ്പം വിളമ്പാം.
