സോയാസോസ് ഫിഷ് ഫ്രൈ
1.മീൻ വൃത്തിയാക്കി കഷണങ്ങളാക്കിയത് – അരക്കിലോ
2.വറ്റൽമുളക് – 12
കുരുമുളക് – കാൽ ചെറിയ സ്പൂൺ
കടുക് – കാൽ ചെറിയ സ്പൂൺ
ചുവന്നുള്ളി – ആറ്
വെളുത്തുള്ളി – എട്ട് അല്ലി
ഇഞ്ചി – ഒരിഞ്ചു കഷണം
ജീരകം – കാൽ ചെറിയ സ്പൂൺ
ഉലുവ – കാൽ ചെറിയ സ്പൂൺ
മഞ്ഞൾപ്പൊടി – കാൽ ചെറിയ സ്പൂൺ
ഉപ്പ് – പാകത്തിന്
3.എണ്ണ – പാകത്തിന്
4.സോയാസോസ് – ഒന്നര വലിയ സ്പൂൺ
5.വെള്ളം – കാൽ കപ്പ്
6.വിനാഗിരി – ഒരു ചെറിയ സ്പൂൺ
പഞ്ചസാര – കാൽ ചെറിയ സ്പൂൺ
പാകം ചെയ്യുന്ന വിധം
∙മീൻ വൃത്തിയാക്കി വയ്ക്കുക.
∙രണ്ടാമത്തെ ചേരുവ മയത്തിൽ അരച്ചതു മീനിൽ പുരട്ടി മൂന്നു മണിക്കൂർ വയ്ക്കണം.
∙പിന്നീട്, അൽപം എണ്ണ ചൂടാക്കി മീൻ വറുത്തെടുക്കണം.
∙മീൻ വറുത്ത എണ്ണ അരിച്ചെടുത്ത്, ആ എണ്ണയിലേക്ക് കാൽ കപ്പ് എണ്ണ കൂടി ചേർത്തു തിരികെ പാനിലാക്കുക. ഇതിലേക്കു സോയാസോസും ചേർത്തിളക്കി ചൂടാക്കണം.
∙പതഞ്ഞു വരുമ്പോൾ വെള്ളവും മീൻ വറുത്ത എണ്ണ അരിച്ചെടുത്ത പിശടും ചേർത്തിളക്കണം.
∙ഇതിലേക്കു വിനാഗിരിയും പഞ്ചസാരയും ഉപ്പും ചേർത്തു ചെറുതീയിൽ വച്ചു തിളപ്പിക്കണം.
∙തിളച്ച ശേഷം മീൻ വറുത്തതു ചേർത്തു മസാല പൊതിയും വരെ തിരിച്ചും മറിച്ചുമിട്ട് എടുക്കുക.
∙ചൂടോടെ വിളമ്പാം.