‘ലോകത്തെവിടെപ്പോയാലും തിരിച്ചു വീട്ടിലെത്തുമ്പോൾ എനിക്കാദ്യം വേണ്ടത് ആ മമ്മി സ്പെഷൽ’: ആർജെ മാത്തുക്കുട്ടി

ലോകത്തെവിടെ പോയാലും ഏതെല്ലാം വിഭവങ്ങൾ കഴിച്ചാലും ശരി, അമ്മയുടെ കൈകൊണ്ടു വിളമ്പിത്തരുന്ന വിഭവങ്ങൾക്ക്ഒരു പ്രത്യേക രുചിയുണ്ട്. സ്നേഹവും കരുതലും ചാലിച്ചു തരുന്ന ആ വിഭവങ്ങളെക്കുറിച്ചുള്ള രുചിയോർമകൾ പങ്കുവയ്ക്കുന്നു, മലയാളികൾക്കു പ്രിയങ്കരനായ അവതാരകനും സംവിധായകനുമായ ആർജെ മാത്തുക്കുട്ടി...

എനിക്കിഷ്ടം മമ്മിയുടെ മീൻകറി: മാത്തുക്കുട്ടി

ലോകത്തെവിടെപ്പോയാലും തിരിച്ചു വീട്ടിലെത്തുമ്പോൾ എനിക്കാദ്യം വേണ്ടതു മമ്മിയുണ്ടാക്കുന്ന മീൻകറിയും ചോറുമാണ്.’’ അവതാരകനും സംവിധായകനുമായ ആർജെ മാത്തുക്കുട്ടി നിറയെ കൊതിയോടെ അമ്മ ശോശാമ്മ മാത്യുവിന്റെ രുചിക്കൂട്ടുകളെക്കുറിച്ചു പറഞ്ഞു തുടങ്ങി. ‘‘പെരുമ്പാവൂരിലെ എന്റെ വീട്ടിലൊരു മീൻകുളമുണ്ട്. മമ്മി അതിൽ നിന്നു മീൻ പിടിച്ച് ഒരു സ്പെഷൽ കറിയുണ്ടാക്കും. എരിവും പുളിയുമെല്ലാം പാകത്തിനുള്ള മീൻകറി. നോര്‍ത്തിന്ത്യയിലും മറ്റും പോയി രാജ്മയും ഛനയും കഴിച്ചു മടുക്കുമ്പോൾ മനസ്സിലേക്കു മമ്മീടെ മീൻകറി ഓടിക്കയറി വരും.’’ അതുകൊണ്ടു തന്നെ നാട്ടിൽ കാലുകുത്തുമ്പോഴേ ആക്രാന്തം വരുമെന്നു മാത്തുക്കുട്ടി.

‘‘അതുപോലെ തന്നെ ഈസ്റ്ററിന്റെ സമയത്തു നാടൻ കള്ളു കൊണ്ടുള്ള കള്ളപ്പവും പാലു പിഴിഞ്ഞ നാടൻകോഴിക്കറിയും മമ്മി ഉണ്ടാക്കും. കള്ളപ്പത്തിന്റെ മുകളിലേക്ക് ചാറൊഴിച്ച്, അപ്പത്തിന്റെ ഓരോ കുഴിയിലും ചാറു നിറഞ്ഞു കുതിർന്ന ശേഷം അതു കഴിച്ചാലുള്ള രുചിയുണ്ടല്ലോ...’’ കൊതിയോടെ ഓര്‍ക്കുന്നു മാത്തുക്കുട്ടി. ‘‘എവിടെപ്പോയി എത്ര നല്ല ഭക്ഷണം കഴിച്ചാലും തോന്നും വീട്ടിലുണ്ടാക്കുന്ന കറി ആയിരുന്നു നല്ലതെന്ന്.’’