വെറും അഞ്ചു മിനിറ്റിൽ കിടിലൻ പുഡ്ഡിങ് റെഡിയാക്കാം. വീട്ടിൽ എപ്പോഴും ഉള്ള വളരെ കുറച്ച് ചേരുവകൾ മാത്രം മതി ഇതുണ്ടാക്കാൻ. എങ്ങനെ തയ്യാറാക്കുന്നത് നോക്കാം.
ചേരുവകൾ
ബ്രെഡ് - 14 സ്ലൈസ്
പാല്‍ - ഒരു ലിറ്റർ
കോൺഫ്ളോർ - ആറ് ടേബിൾ സ്പൂൺ
പിസ്താ പൗഡർ - 100 ഗ്രാം
ഏലയ്ക്കാപ്പൊടി - ഒരു ടീസ്പൂൺ
കണ്ടൻസ്ഡ് മിൽക്ക് - ഒരു ടിൻ
തയാറാക്കുന്ന വിധം
ഒരു ലിറ്റർ പാലിൽ നിന്ന് അൽപം പാലെടുത്ത് കോൺഫ്ളോർ മിക്സ് ചെയ്ത് മാറ്റി വയ്ക്കുക.
ബാക്കി പാൽ തിളപ്പിക്കാൻ വയ്ക്കാം.
ഇതിലേക്ക് കണ്ടൻസ്ഡ് മിൽക്കും കൂടെ ഒഴിച്ച് നന്നായി ഇളക്കി യോജിപ്പിക്കുക.
നന്നായി ചൂടായി വരുമ്പോൾ കോൺഫ്ളോർ മിശ്രിതം ഒഴിച്ചു കൊടുക്കാം. കൈവിടാതെ ഇളക്കിക്കൊണ്ടിരിക്കണം.
ശേഷം നന്നായി തിളയ്ക്കുമ്പോൾ ഇത് ഓഫ് ചെയ്യാം.
ഇതിൽനിന്ന് അൽപമെടുത്ത് പിസ്താ പൊടിയുമായി യോജിപ്പിച്ച് വീണ്ടും പാലിലേക്ക് ഒഴിച്ചുകൊടുത്ത് എല്ലാം കൂടെ നന്നായി ഇളക്കി യോജിപ്പിക്കുക.
സെറ്റ് ചെയ്യാനായി ഒരു പാത്രം എടുത്ത് തയാറാക്കിയ പാൽ മിശ്രിതം ഒഴിച്ചതിനു ശേഷം അതിൻറെ മുകളിൽ ബ്രെഡ് നിരത്തി വയ്ക്കുക.
വീണ്ടും പാൽ മിശ്രിതം ഒഴിക്കുക, വീണ്ടും ബ്രഡ് വയ്ക്കുക. അങ്ങനെ പാത്രം നിറയെ വെച്ചു കൊടുക്കാം.
ശേഷം ഏറ്റവും മുകളിൽ കുറച്ച് പിസ്ത പൗഡർ കൂടെ വിതറി അലങ്കരിക്കാം.
ഇത് ഫ്രിജിൽ 3 മണിക്കൂർ തണുക്കാനായി വയ്ക്കുക. മൂന്ന് മണിക്കൂർ തണുത്തതിനുശേഷം വിളമ്പാം.
