റിസോർട്ടിന്റെയും വീടിന്റെയും ഗുണങ്ങൾ ഒരുമിച്ചുകിട്ടിയാൽ ആരാണ് സന്തോഷിക്കാതിരിക്കുക. ഒരു റിസോർട്ടിലേതുപോലെ ശാന്തമായും മനോഹരമായും ഒരുക്കിയ അകത്തളത്തിൽ കാറ്റിനും വെളിച്ചത്തിനും പഞ്ഞമില്ല എന്നതാണ് കോഴഞ്ചേരി ചെട്ടിമുക്കിലുള്ള ഈ വീടിന്റെ പ്രത്യേകത. തിരുവനന്തപുരത്തുള്ള ആർക്കിടെക്ട് സോനു ജോയ് ആണ് ഡിസൈൻ തയാറാക്കിയത്.
3818 ചതുരശ്രയടിയുള്ള ഈ ഇരുനില വീട് കന്റെംപ്രറി ശൈലിയിലാണ് നിർമിച്ചിരിക്കുന്നത്. അകത്തളമൊരുക്കിയതാകട്ടെ, മുറികൾ പരസ്പരം തുറന്നിരിക്കുന്ന രീതിയിലും. ആവശ്യാനുസരണം നേരിട്ടുള്ള കാഴ്ച ഇല്ലാതാക്കാൻ കഴിയുന്ന തരത്തിലാണ് മുറികൾ വിഭജിച്ചിരിക്കുന്നത്. ലിവിങ്ങിനെയും ഫാമിലി ലിവിങ്ങിനെയും വേർതിരിക്കുന്ന ഭിത്തിയോടു ചേർന്ന് ഒരു വാട്ടർബോഡിയുണ്ട്. ഈ ഭിത്തിയുടെ മറുവശത്താണ് ടിവിക്ക് സ്ഥാനം. ഫാമിലി ലിവിങ്ങിനും ഡൈനിങ്ങിനും ഇടയിലുള്ള ബ്ലൈൻഡ് പൊന്തിച്ചാൽ രണ്ടു മുറികളും ഒന്നായി, വിശാലമായി.
ലിവിങ്, ഫാമിലി ലിവിങ് എന്നീ ഭാഗങ്ങൾ ഡബിൾ ഹൈറ്റ് ആയാണ് നിർമിച്ചിരിക്കുന്നത്. സീലിങ്ങിൽ നൽകിയ വലിയ സൺലിറ്റുകളും ഭിത്തിയിലുടനീളമുള്ള ജനലുകളും വീടിനുള്ളിൽ പ്രകാശം നിറയ്ക്കുന്നു. ഈ പ്രകാശം പ്രയോജനപ്പെടുത്തുന്നത് സൈഡ് കോർട്യാർഡിലെ ചെടികളാണ്. സുന്ദരമായി ഡൈസൻ ചെയ്ത പൂന്തോട്ടമാണ് ഈ വീടിനെ ആകർഷകമാക്കുന്ന മറ്റൊരു ഘടകം. ഈ പൂന്തോട്ടത്തിന്റെ ഭംഗി ആസ്വദിക്കാൻ സിറ്റ്ഔട്ട് കൂടാതെ വീടിനോടു ചേർന്ന് വരാന്തയുമുണ്ട്. മൂന്ന് കിടപ്പുമുറികളാണുള്ളത്. രണ്ടു നിലകളെയും കോർത്തിണക്കുന്ന ഗോവണി അകത്തളത്തിന്റെ മറ്റൊരാകർഷണമാണ്. ലൈറ്റിങ്ങിലൂടെയും വ്യത്യസ്തതയാർന്ന നിർമാണസാമഗ്രികളുടെ ഉപയോഗത്തിലൂടെയുമാണ് അകത്തളത്തിന്റെ പ്രൗഢി അതിന്റെ പരമോന്നതയിലെത്തുന്നത്.
സോനു ജോയ്, ആർക്കിടെക്ട്, ഡെൻസ് ആർക്കിടെക്ട്സ്, തിരുവനന്തപുരം– 9567882249